Lewati ke isi

Prasasti Mula Malurung

prasasti-mula-malurung Sumber:

Prasasti Mula Malurung terdiri dari 12 lempeng tembaga yang berisi tentang penganugrahan sima atas tanah di Desa Mula dan Desa Malurung. Prasasti ini diterbitkan oleh Raja Muda Kṛtanagara atas perintah Raja Wiṣṇuwarddhana dari Singhasāri.

Dua belas lempeng prasasti tersebut ditemukan pada dua masa yang berbeda. Kumpulan lempeng yang diidentifikasi dengan nomor I, III, V, VII-XII ditemukan pada tahun 1975. Sementara lempeng II, IV dan VI ditemukan pada tahun 2001.

Kemudian terdapat dua lempeng lain yang menjadi koleksi Puslitbang Arkenas dan Museum Nasional. Kedua lempeng ini ternyata berurutan dan sejalan dengan lempeng I-II dalam 12 lempeng di atas.

Data Artefak

Nomor: E.90(a-j)
Jenis: Prasasti
Tahun: 1255 M / 1177 Śaka
Aksara: Kawi
Bahasa: Jawa Kuna
Lokasi: Kotamadya Kediri, Jawa Timur
Sekarang: Museum Nasional Indonesia

Inskripsi

I.b

  1. || o || nama śiwaya || o || swasti śakawarṣātīta. iƞ śaka. 1177. mārggaśira māsa. tithi pañcada-
  2. śi śuklapakṣa. ma. u. bu. wara juluƞ. grahacāra. nairitistha. adrā nakṣatra. śulabhṛt dewata. baruṇa maṇḍa-
  3. la. indra yoga. kuwera. parwweśa. karkkaṭa. rāśi. wiswabasu muhūrtta. wawa karaṇa. irika diwaśānyājñā pādu-
  4. ka śrī mahārāja. sakwaiḥ nira kṛta pratiṣṭa dai nira narāryya sminiƞrāt. riƞ sanagara-sanagara. makamukhya śrī
  5. mahārāja. śrī lokawijaya puruśottama wīrāṣṭabasudewādhipāniwāryyawiryya-nindita parakrama mūrdwa-
  6. ja namottuṅgadewa. kṛtānagarābhiseka nāmalañcana. maka purassārānugraha nira bhaṭāra parameśwara
  7. śrī sakalayawadwīpa naranāthādiguru. sira saƞ pinaka guru dai niƞ samaptagrāma. samasta kṣatriya. makādi sa-

II.a

  1. kweḥ nira prabhū ṅke riƞ nūśa jawa. mwaƞ makottuṅgānugraha nira narāryya sminiƞrāt. śrī yawadwīpa samasta rājādi-
  2. wiśeṣānindita saṅgrāma parakrama digwijayāniwāryyawīryyasnahanāmottuṅga-dewa. prakaśita sminiƞrāt nā-
  3. ma lañchana. tinaḍaḥ dai nira sama kṣatriya. makādi rakryan mahāmantrī hino. rakryan mahāmantrī sirikan. ra-
  4. kryan mahāmantrī halu. umiṅsor para taṇḍa rakryan riƞ pakirākiran makādi saƞ pamgat i tirwan. puspapāta ḍ-
  5. aṅ ācāryya jayaṅga saƞ pamgat iṅ kaṇḍamuhi. puspāta ḍaṅ ācāryya marmmanantha. saƞ pamgat i maṅhūri puspāta ḍaṅ ā-
  6. cāryya graja. tlas karuhun saƞ rāmapati. mapañji siṅharṣa. an akibegos makasirkasir aṅgaḥ wahas. mapa-
  7. ñji buliṇḍaḥ. apasĕṅgahan saƞ prāṇarāja. padamlakna saƞ hyaƞ rāja praśasti. umuṅgwe ṅupala. tambra. ripta kunaƞ. sa-

II.b

  1. mbhanda. gati saƞ prāṇarāja. ankadi hulun kalilin parṇnaḥ saƞ prāṇarāja śaiwake sira narāryya sminiƞrāt. tiṅkah saƞ
  2. prāṇarāja. śaiwaka ri sira kaki nira narāryya sminiƞrāt. sira saƞ līna riƞ ḍāmpa mās. sira saƞ pinratiṣṭa nira narāryya
  3. sminiƞrāt. makaswarūpaƞ wiṣṇwarccha. maṅkāne saƞ hyaƞ dharmme kagnĕṅan. maka saṅ ajñā narasiṅha nagara. saƞ prāṇarāja
  4. pinaka hastapāda dai narāryya sminiƞrāt. ri kāla niƞ kāryya pratiṣṭa. mahābhāra. muwaḥ ri paƞḍiri nīra rāma nira
  5. narāryya. gumantya ni paƞḍiri nira kaki nira. śaiwaka saƞ prāṇarāja. ri sira rāma nira sira pāduka saṅ ahulun sa-
  6. ṅ ajñā nira. sira saƞ tlas pinratiṣṭa maka swarūpaƞ wiṣṇwarccha de nira narāryya sminiƞrāt. ṅkane saƞ hyaƞ dharmma ri kiḍal. ma-
  7. ka nāmadheya narasiṅhāsana. saƞ prāṇarāja lotsāri pinaka taṅan suku nira. ri kāla niƞ kāryya pratiṣṭa bhūmi.

III.a

  1. śoddhanādi. mwaƞ ri kāla ni kapratiṣṭa nira pamanirātĕhĕr pinaka rāmātuha nira. sira saƞ lineƞ kubwan agĕƞ.
  2. rāma nira narāryya waniƞhyun. kaki nira rānakira. sira śrī kṛtānagara. sira maka swarūpaƞ wiṣṇwarccha. ṅkāne saƞ hyaƞ
  3. dharmme pikatan. saƞ prāṇarāja muwaḥ pinaka hastapāda de narāryya sminiƞrāt. ri kāla ni bhūmiśoddhanā-
  4. di. muwaḥ ri kāla kapratiṣṭa nira yuyut ira. ṅkāne saƞ hyaƞ dharmma ri kalaƞ bret. saƞ prāṇarāja pinaka pura-
  5. ssāra niṅ aƞhuwusakĕn samahābhāra ni kāryya. muwaḥ ri kāla nira narāryya sminiƞrāt anusuk dharmma ṅkāne
  6. pagĕr. maka nāmadheya narasiṅharājya. saƞ prāṇarāja lot hati pinaka parabwat nira. waluyan taṅ ujar.
  7. anantara saṅke līna nira pamanira pwa. aṇḍiri ta sira pamanira. sira narāryya guniƞ bhaya. śaiwaka saƞ prāṇarā-

III.b

  1. ja ri narāryya guniƞ bhaya. swarggastha pwa narāryya guniƞ bhaya. gumanti ta narāryya toḥjaya. pramaṇa riƞ jagat
  2. kaka sira dai narāryya guniƞ bhaya. paman muwaḥ dai narāryya sminiƞrāt. śaiwaka muwaḥ saƞ prāṇarāja ri narāryya
  3. toḥjaya. līna pwa nāraryya toḥjaya. narāryya sminiƞrāt ta pinasaṅakĕn prajāpatya. dai para śaiwaka
  4. makādi saƞ pamgat iƞ raṇu kabayān saṅ apañji pati pati. maka ḍapur ikaƞ nagara tumapĕl makasiṅha nira pāduka mpu-
  5. ṅkwiƞ kapuluṅan sirānawasthā. sthāpaka riƞ kabhairawan. sira tānusuk saƞ hyaƞ dharmma panaiwaśikān riƞ tahĕn ma-
  6. nis. dinadyakĕnira kakolikān. makāṅśa. sadṛwya haji nikaƞ tahĕn manis. tinūttyan piṇḍaḥ watĕ-
  7. k wuga. maka nimitta rĕṇa nira narāryya sminiƞrāt. an digwijayān maka sthāpake sira. muwaḥ hana ta sira brāhmana

IV.a

  1. paramartweṅajñā. sira rāghawadewa ṅaran ira. apasĕṅgahan brahmārājaguru. sira ta wineh anusuka dharmma
  2. sīma swatantra. kakolikan. riƞ bhūmi jaṅgala. ika maṅaran i hasĕm pañjaƞ. lāwanya ranaka nikaƞ pañjiƞ dharmma ri hu-
  3. juƞ maṅaran ryy yayoddhya. mwaƞ hana ta sira madaka ṅaran ira. parama yajurwwedajña. agamajña. paramatatwa wit
  4. sira ta pinaka purohita nira rāka nira. sira śrī krtānagara. pinariwrttha ta sira de niṅanya brāhmana wedapāra-
  5. ga. lwir nira. pragwedajñā yūwwedajñā sāmawedajña. sinewita ta sira de niṅ aneka bhadamantrīmukya. makā-
  6. di saƞ pamgat iƞ raṇu kabayān mapañji patipati. saƞ wineh anusuka dharmma sīma swatantra. ṅkāneƞ bhūmi jaṅgala. ma-
  7. kanā. māƞkṛṣṇapura. saƞ rāma pati. mapañji siṅharsa. apatih i sira śrī śastrajaya. śaƞ sinuṅ anusuka dharmma sima

IV.b

  1. tantra. ṅkāneƞ bhūmi kaḍiri. makanā mamitra puri saṅ apañji. nirākāra. dmuƞ riƞ jaṅgala. sumiwī śrī harṣawijaya. saƞ
  2. wineh anusuka dharmmasīma swatantra. ṅkāne bhūmi jaṅgala. maka saṅ ajñā surāsana. saṅ apañji dūtarāga. prahajya-
  3. n. saƞ wineh anusuka dharmma sīma swatantra. ṅkāneƞ bhūmi wetan iƞ kawi. maka saƞ jñākṛtāsana. saṅ apañji samaka. a-
  4. patih ira narapati kṛtānagara. saƞ inanugrahan anusuka sīma swatantra. ṅkāneƞ bhūmi jaṅgala. makanāmaƞ harija-
  5. ya. saṅ apañji siṅanambat. apatih i wurawan. amaṅku kaprabhū ni raji jayakatyöƞ. saƞ wineh anusuka dharmma sī-
  6. ma swatantra. ṅkaneƞ bhūmi kaḍiri. ataganikaƞ wahuta rāma triṇitaṇḍa. maka saƞ jñākṛṣṇāsana. tlas karuhun saƞ
  7. prāṇarāja. saƞ nityadhirotsahāṅalocittanayopāya riṅ ahorātra. dumadyakĕn swāsthā niƞ rāt

V.a

  1. ṅūni ṅūni kadigwijaya nira narāryya sminiƞrāt. samaṅkana pinakādi niƞ śaiwaka ri sira narāryya sminiƞrā-
  2. t. kapwa ta lwi-lwihan kabhaktin. aṅulahakĕn dharmma niƞ śaiwaka saptati. dwāra saƞ prāṇarāja tan kewĕhan amaṅ-
  3. hyaṅakĕn sakapti ni rowaṅ ira śaiwaka. ri sira narāryya sminiƞrāt. paṅawruhana yan maṅkana. pada kṛtānu-
  4. graha sakweh iƞ pinakādi niƞ śaiwaka samaṅkanā lwir nira. hatur saƞ prāṇarāja nimitta nikā. tuhun saƞ prāṇarāja ju-
  5. ga tapwan kṛtānugraha ri kasusukan iƞ sima. de nira saƞ prabhu saƞ tlas kapratiṣṭa dai narāryya sminiƞrāt. i tan maṅka-
  6. na sukha saƞ prāṇarāja. maṅkin dhirotsaha. an kanitabahu nāyaka. śaiwaka ri rowaṅ niṅ aśaiwaka. mwaƞ śai-
  7. waka ri sakweḥ nira prabhu ṅke riƞ nūśa jawa. mwaƞ i madhura. ṅūni ṅūni kasuṣṭubhaktin saƞ prāṇarāja ri sira narā-

V.b

  1. ryya sminiƞrāt. āpan tan hana dewa makādiƞ brahmā wiṣṇu maheśwara. an lena saṅke sira narāryya smi-
  2. niƞ rāt. wnaṅ aṅanugrahakna sakāpti niƞ śaiwaka mahābhāra ri sira. mwaƞ wnaṅ aƞrakṣa yogya rakṣan. an-
  3. ḍaṇḍa yogya ḍaṇḍan. rumākṣaƞ sarwwadharmma. mūnarjiwakĕn sahana niƞ dharmma parikṣi[r]ṇa. tan paweḥ ryyabhicaruka
  4. niƞ lmaḥ bala. lāwan sahana niƞ sīma para sīma. kalaƞ. kalagyan. kamūlan. kakurugan. kuṭi wihāra. śā-
  5. la. parhyaṅan. karṣyan. umaluyakĕn pūrwwa sthitinya juga sira. kumatuturakĕn sakramanya ṅūni riƞ muhun mala-
  6. ma. maka nimitta wdi nirān kacampurana pamaṅunira dharmma. apituwi praśāsti kadānaśūra nira. asaṅkye ya saƞ
  7. brahmāṇa. kṛtadāna pratigraha saṅke sira. lumrā ta kirttyanuragā nira riƞ rāt. śaratkāla pūrṇnaca-

VI.a

  1. ndrajyotsnanibha. ankaditadilaḥ niƞ pūrṇna śasāṅka ri kāla niƞ lahṛu prakāśa ta kasūradhīra siṅha nira.
  2. aniwāryyawīryya nira. aninditiparakrama nira riƞ ranāṅga. maddhyahnādityakara sutaikṣṇya pratima. anka-
  3. dita satiśaya ni panasiteja niṅ aditya ri kāla niƞ tṅah ṅ-wai. saƞ siptanya. śuraśaktitani sira riƞ ranāṅga
  4. maṅkāna hiḍĕp saƞ prāṇarāja riƞ swahṛdaya. dumeḥ saƞ prāṇarāja maṅkāna. yāwat hana sira purusa wnaṅ aṅanugra-
  5. ha kna sakahyun ƞ śaiwaka ri sira. sira paśarīra niƞ sarwwa dewa makadi ƞ tridewa. sira mātā. sira pitā. sira
  6. guru. ikā ta dwāra saƞ prāṇarāja. ekacitta gumawayakĕn guru suśrusān. ana śaiwaka ri sira narāryya
  7. sminiƞrāt. muwaḥ tan hana mātāpitā. guru. an lenasaṅkeƞ kaditiṅkah ira sinewaka paḍa lāwan sira na-

VI.b

  1. rāryya sminiƞrāt. paṅawruhana yan maṅkana. katon dai nika[ƞ] niṣṭa maddhyamottama. saƞ prāṇarāja nitya saƞ sa-
  2. rgga mwaƞ saƞ rāmapati. anaṅkil ri sira narāryya sminiƞrāt. aṅalocittanayopāya. mwaƞ ṅalampahakĕn bala
  3. kośa wāhana. dumadyakĕn sthīratara ni paluṅguḥ nira saƞ prabhu riƞ maṇikanaka siṅhāsana. mwaƞ dumadyakĕn wṛ-
  4. ddhi niƞ yaśānurāga nira narāryya sminiƞrāt. prakaśita riƞ nūśa para nūśa. tinūt i parāmadigwijayanira narāryya
  5. sminiƞrāt. an mahakĕn samalĕlö niƞ sayawadwīpa maṇḍala. anūluyan i nūśāntara. nāƞ madhura. makawyakti sira
  6. śrī harṣawijaya. parṇnaḥ pahulunan dai nira narāryya sminiƞrāt. inandĕlakĕn muṅgweƞ ratnakanaka siṅhā-
  7. sana. ṅkāneƞ bhūmi jaṅgala. putra nira saṅ apañji dimūrttī. rakryan kulupkuda. ipe de nira narāryya sminiƞ-

VII.a

  1. rāt. inadgakĕn prahajyan ṅkāneƞ nagara madhura. ri kāla saṅ apañjyādimūrtti mare tumapĕl. sira narā-
  2. ryya kiraṇa. sakṣat ātmaja nira narāryya sminiƞrāt. pinratiṣṭa juru lamajaƞ. pinasaṅakĕn jagat pālaka. ṅka-
  3. neƞ nagara lamajaƞ. sira narāryya mūrddhaja. atmaja nira muwaḥ. sira śrī kṛtānagara nāma niran inabhiśeka. pi-
  4. nasaṅakĕn ṅkāneƞ maṇikanaka siṅhāsana. riƞ nagara daha. sinewita niƞ bhūmi kaḍiri. sira turuk bali. putrī
  5. nira narāryya sminiƞrāt. pinaka parameśwarī nira śrī jayakatyĕƞ. sakṣat kapwanakan ira narāryya sminiƞrāt
  6. sira pinratiṣṭa ṅkāneƞ maṇikanaka siṅhāsana. maka nagare glaƞ glaƞ. sinewita dai nikaƞ sakala bhūmi wurawā-
  7. n. sira śrī ratnarāja. parṇnah ari wwaƞ sānak amisan de narāryya sminiƞrāt. pinratiṣṭa ṅkāneƞ maṇikanaka siṅhā-

VII.b

  1. sana. riƞ rājya i moroṇo. sira śrī narajaya. parṇnah aryya misan dai narāryya sminiƞrāt. sirenandĕla-
  2. kĕn riƞ maṇikanaka siṅhāsana. ṅkāneƞ nagara ri hriƞ. sira śrī sabhājaya. parṇnah aryya misan dai narāryya sminiƞrā-
  3. t. sira pinratiṣṭa ṅkāneƞ [maṇi]kanaka siṅhāsana. ri nagara lwa. sira saƞ prabhu samaṅkana lwir nira. kapwa ta sira tlas kṛ-
  4. tābhiśeka dai nira narāryya sminiƞrāt. ṅkāne nagara nira sowaƞ sowaƞ. saƞ prāṇarāja lot sāri lina-
  5. mpahakĕnira narāryya sminiƞrāt. tūt niƞ senawṛnda śaiwaka. yadyan brāhmaṇa. rĕśi. śaiwa. sogata. a-
  6. tĕhĕr amrayogakĕn sādhana. sādhana niƞ kāryya mahābhāra. rājābhiśekādi. āpan tan hana śaiwaka kadi anĕṅgah alapā. ta-
  7. saƞ prāṇarāja. śaiwaka ri sira narāryya sminiƞrāt. tan wruh anĕṅgaḥ maṅgalya. tan wruh anĕṅgah alapā. ta-

VIII.a

  1. n wruh anĕṅgaḥ dūrggama. yāwat inutus niƞ kadi sira śinewaka. lumampaḥ juga tan asuna. nimitta saƞ prāṇarā-
  2. jān maṅkana. āpan niyatāmaṅguhakĕn abhyudāya riṅ ihātra parātra. ikaƞ wwaƞ nitya ṅūlahakĕn dharmma ni śai-
  3. waka saptati. an maṅkana lkas i saƞ prāṇarāja śaiwaka. sāri saryya ṅlampahakĕn sapaṅutus ira narāryya sminiƞrā-
  4. t. apituwyan kaniseṣṭasādhya ni manaḥ nira narāryya sminiƞrāt. riƞ wāhyadhyātmika. ikā n maṅkana. tapwan saƞ
  5. prāṇarāja inanugrahan ri kasusukaniƞ sīma. ika ta dwāra sama śaiwaka labdheṣṭa prayojana. huwus
  6. kṛtānugraha. makādi saƞ rāmapati. mahĕm malapkna. musapa reṇucaraṇadwaya nira narāryya sminiƞrāt. aƞ-
  7. hyaṅa turunani warasanmata nira narāryya sminiƞrāt. aṅanugrahakna thāni sāwakanya. dadyakna sīma ma-

VIII.b

  1. pakna i saƞ prāṇarāja. riƞ tad anantara. marĕk ta sakweḥ saƞ labdhānugraha. maka paṅhulu saƞ rāmapati. riƞ śū-
  2. nyadeśa. panambahi manömanöhi lmah i talapakani kadi bhāwa nira dewamūrtti lobhāƞhyaƞ tulusani wa-
  3. ra prāsāda lmah i talapakan ra saṅhulun i manömanöhiƞ kadi bhāwa nira. ndya ta tulusani siḥ sanmata nire
  4. manömanöhira. hilaṅakna duḥkha manastāpa ni manömanöhira. makadwāra tan sama ni wara prasāda lmah i tala-
  5. pakanira. aṅanugrahakĕn sukhā sama sama. makādi kasusuka niƞ sīma. ri manömanöhira makabehan. tu-
  6. hun manömanöhira pun prāṇarāja. tapwan inanugrahan sīma de lmah i talapaka nira. punikā tāṅde ci
  7. ttas kālitāṅdadyakĕn duḥkha manastāpa. riƞ swahṛdaya ni manömanöhira sowaƞ sowaƞ. an kadi ta manö-

IX.a

  1. manöhira kṛtāghna. kadi tan wruh iṅ aguṇa. kādi tan guṇa grahi. kādi swartha kewala. samaṅkānādi ni-
  2. kaƞ dośa tumama ri manömanöhira. mwaƞ kadi paṅtibhedi lmah i talapakan ra saṅhulun. ya tan pānulus asiḥ
  3. sanmata lmah i talapakanire manömanöhira. saƞsipta ni panĕmbah i manömanöhira maka śirsassnāna ra-
  4. rabi lmah i caraṇadwaya niƞ kadi sira dewamūrtti. aƞhyaƞ turunani warānugraha lmah i talapakanira. i ri pu-
  5. n prāṇarāja. makanimitta yogya nipun anugrahana thāni. sathāni rwaƞ thāni dadyakna sīma swatantra. gañja-
  6. rananipun nitya gumawayakĕn dharmma niƞ śaiwaka saptatī. maka tĕmbeyani sira kaki nira. namaste sira bhaṭā
  7. ra namaś śiwāya. sira saƞ līna riƞ ḍampa kanaka. makāwasāna paƞḍiri lmah i talapakan ra saṅhulun. an pi-

IX.b

  1. naka ika cchātra niƞ bhūwana sayawadwīpa maṇḍala. anuluyan i nūśāntara. an maṅkana panambaḥ saƞ rāmapati.
  2. tan wawaƞ sirāsaṅgup. sḍaṅ ekacitta rumasa ni parama yogya ni panambaḥ saƞ rāmapati. āpan swabhāwa niƞ
  3. kadi sira dewamūrtti wiṣṇwatāra. tan wawaṅ asaṅgup. mwaƞ tan dadi tan paƞrĕṅö hatur niƞ śaiwakāṅdadyakĕn hi-
  4. tāwasāna. tan dadi tanpāṅanugraha ni śaiwakāƞlampahakĕn kaśaiwakanuttama ri sira. riṅ awasāna. tan a-
  5. dawāsaharira. sampun kasaƞsipta yukti ni rasa ni sirat i madhura wacana saƞ rāmapati. atyantā parama santu-
  6. ṣṭi ni manah iṅ hulun maka nimitta patut i buddhi niṅ hulun. lawan sakinaptyakĕn ra saṅhulun makabehan.
  7. ndan hana bhedannyamatra. alāmaṅhulun ahyun asūṅa deśa lor iƞ nagara. maka nāmaƞ mūla. mwaṅ i maluruƞ. da-

X.a

  1. dyakna sīmādĕg riṅgita. gañjarakna i saƞ prāṇarāja. saha kāryyana kawnawnaṅa niƞ kadaṅ haji jaṅgala kaḍi-
  2. ri. mwaƞ wṛtti sawṛtti niƞ kadaƞ haji jaṅgala kaḍiri. makādiṅ akarmma. wālya wālya. ri hana ni saƞ prabhu mahā-
  3. bhāra. tūtĕn i sasantāna pratisantāna saƞ prāṇarāja. kadaṅ haji ri dlāha niƞ dlāha. saƞsiptanya. saha kāryya-
  4. nugraha niƞ kakadaṅ hajyan dai niṅ hulun maṅanugrahaṇa sīma ri saƞ prāṇarāja. tuhun awdi taṅ hulun li-
  5. ṅgacchāya ri sira sama prabhu makabehan. sakweḥ nira tlas pinratiṣṭa ṅkāneƞ maṇikanaka siṅhāsana. ma-
  6. kalarapana kasāmarthyan ra saṅhulun makabehan ta yan maṅkana. tulusakna pamahārsuka ra saṅhulun. ri
  7. yogya ra saṅhulun makabehan muwaḥ. aƞdulurāṅusapa lbu ni pāduka nira śrī mahārāja makabehan

X.b

  1. makādi sira śrī kṛtānagara. amöṅakna pasamagri nira maṅke ri kāla ni kapūjānira bhaṭāra parameśwa-
  2. ra. an maṅkana rasa ni sirat i maṇikira narāryya sminiƞrāt. laris ta sama labdheṣṭa prayojana. makapaṅhu-
  3. lu saƞ rāmapati. humaṇḍĕm anambah umusap lbū ni pāduka nira śrī mahārāja makabehan. maka pura-
  4. ssāra sira śrī kṛtānagara. kathañcana masamagrī sira sama prabhu manaṅkil i sira śrī kṛtānagara. sanyasā-
  5. naṅkila ri sira pāduka bhaṭāra. labdha manoratha saƞ rāmapati. maṅgihakn īṣṭasādhya. ri kapaṅgihira para
  6. prabhu masamagrī kāṅkĕn aƞhaturakna pūjā ri sira pāduka bhaṭāra. makādi sira śrī kṛtānagara. humatur saƞ
  7. rāmapati ri sanmuka nira sama prabhu. maka nāryyama sira śrī kṛtānagara. panambaḥ patik haji ri pāduka

XI.a

  1. śrī mahārāja samudāya. maka pramakai pāduka śrī kṛtānagara. amuṅahakna kinapatyaknira rāma
  2. pāduka śrī mahārāja. ri hana ni jijñāsa nira rāma pāduka śrī jagannātha. aƞdadyakna sīmādĕg riṅgita.
  3. ikaƞ deśa lor iƞ nagara maka nāma mūla. mwaṅ i maluruƞ. donanya. gañjarakna ri patik haji pan prāṇa
  4. rāja. saha kāryyanatānugraha niƞ kakadaƞ hajyan. kakadaƞ hajyan iṅ kadaƞ haji jaṅgala kaḍiri. tūt nīƞ
  5. santāna prātisantāna patik haji pun prāṇarājāwaṅkakadaƞ haji. ri dlāha niƞ dlāha. ndan awalĕra wara prāsā-
  6. da śrī naranātha. kadulura dai ni wara prāsāda nira para prabhu samudāya. wdi nira rāma śrī mahārāja liṅga-
  7. cchāya riṅ kadi bhawa pāduka śrī mahārāja jagannātha. apan pāduka śrī narādhipa sākṣāt makadṛwyekaƞ pṛ-

XI.b

  1. thiwi maṇḍala. liṅ ira rāma pāduka śrī jagannātha. mwaƞ pāduka śrī mahārāja wnaƞ wigrahānugraha. an maṅka-
  2. [na] pari samāpti ni hatur saƞ rāmapati. kapwa ta sira tumulyasaṅgup. samarasanyājña nira. niyatānkani sakinā-
  3. ptyak nira narāryya sminiƞrāt. kunaƞ sira śrī kṛtānagara juga tan wawaṅasaṅgup. paṅdani kadewamūrttya nira.
  4. mwa[ƞ] paṅdainyanugraha ni dewa wiśeṣa ri sira. an sirenahākĕn sakala jagat pālaka. naranātha rāja. a-
  5. tĕhĕr alona lampaḥ turunyājña nira. tan bheda rasanya lāwan rasanyājña nira sama prabhu. uwa saƞ rāmapati
  6. sampun ta saƞsipta rasa ni psat psat i madhura wacana ra saṅhulun uwa. makārasābuka ri hana ni jijñāsa nira ra
  7. bapa. aƞdadyakna sīma swatantrādĕg riṅgita. irikaƞ deśa lor iƞ nagara. maka nāma riƞ mūla mwaṅ i maluruƞ

XII.a

  1. mapakna gañjarakne saƞ prāṇarāja. masaha karyya kānugraha niƞ kakadaƞ hajyan. larapanyan waṅśa kadaƞ ha-
  2. ji sasantāna pratisantāna ra uwa saƞ prāṇarāja. ri dlāha niƞ dlāha. mwaƞ tūt niƞ kawnaƞ wnaṅa niƞ kadaƞ haji. kawnaṅa
  3. kna ni santāna pratisantāna ra uwa saƞ prāṇarāja. ri dlāha niƞ dlāha. yadyan umuṅgwe sīma. umuṅgweṅ anyadeśa
  4. makādi nagara. atĕhĕr akarmma. walya walya ri hana ni kāryya nira saƞ prabhu mahābhāra. makendhikā. pahyaƞ
  5. ri suka nira sama prabhu. anugrahakna sakinaptyak nira ra bapānugrahakne ra uwa saƞ prāṇarāja. ikā ta kahyun i
  6. rara bapa maṅkana. alpa ri ḍĕpin hulun. apituwi. aṅdadyakĕn kastutya nira sama prabhu. mwaƞ halĕp iƞ kadi sira pra-
  7. bhu. yadyan mahābhāra towi kaharĕp ira ra bapa. ri sira sama prabhu makabehan. ndan yan mapakne ra uwa

XII.b

  1. saƞ prāṇarāja. ahamsaraṅ hulun uwa saƞ rāmapati. ri katka ni kāpti nira ra bapa dai nira sama prabhu. āpa-
  2. n karĕṇan hinaturan sukāsama sama sira makabehan dai nira ra bapa. maka sahāye ra uwa saƞ prāṇarāja.
  3. mwaƞ kasāmārthyan ra saṅhulun kabeḥ. āpan tan hana kadaƞ wargga pahutaṅa niƞ kādi sira prabhu. lena saṅkeṅ amra-
  4. siddhakĕn kaprabhu nira. mwaƞ dumadyakĕn karayastweni keśwaryya nira. sira sama prabhu. paḍāntuk ira ra bapāmratiṣṭa.
  5. ṅkāneƞ maṇikanakamaya siṅhāsana. riṅ nagara sanagara. maka sahaye ra uwa saƞ prāṇarāja. ṅūni-ṅūni kapra-
  6. bhu niṅ hulun. nora śewake sira ra bapa. paḍa lāwan ra uwa saƞ prāṇarāja. lot sari pinaka rowa-
  7. ṅira ra bapāṅalocittāguṇa buddhi riṅ ahoratra. katiṅhalan dai niṅ hulun. an maṅkana. paran ta tan suka.

Terjemahan Bebas

(Belum tersedia)

Referensi: